የኮምቦልቻ ፖሊቴክኒክ ኮሌጅ ሠራተኞችና ሰልጣኞች በአገር አቀፍ ደረጃ ለ45ኛ በአዓም አቀፍ ደረጃ ደግሞ ለ112ኛ ጊዜ የተከበረውን ዓለም አቀፍ የሴቶች ቀን (ማርች 8) "የሴቶችን ሁለንትናዊ መብት የሚያከብር ትውልድ እንገንባ" በሚል መሪ ቃል የካቲት 29/2013 በኮሌጁ የመሰብሰቢያ አዳራሽ በደማቅ ስነስርዐት ተከብሯል፡፡ በአሉን አስመልክተው የመክፈቻ ንግግር ያደረጉት የኮሌጁ የውስጥ ኦዲት ባለሙያ ወ/ሮ ጌጤ ክብረት እንደተናገሩት ሴቶች በየትኛውም መስክ ያላቸው ሚና ከፍተኛ ቢሆንም የመሪነት ቦታዎች ላይ ያላቸው ተሳትፎ ዝቅተኛ ነው፡፡ ይህም ሴቶች አይችሉም የሚለው ስር የሰደደ ኋላ ቀር አስተሳሰብ ውጤት ያመጣው በመሆኑ ሴቶች ሊታገሉት ይገባል ብለዋል፡፡ ወ/ሮ ጌጤ አያይዘው እንደተናገሩት ሴቶች እድል እንጅ ችሎታ አላጡም ብለዋል፡፡ ክብረ በአሉን ደማቅ ለማድረግ አዝናኝና አስተማሪ የሆኑ ልዩልዩ ስነ ግጥሞች በየፕሮግራሙ መሀል መሀል በሰልጣኞች ቀርቧል፡፡ በሌላ በኩል ደግሞ በቴክኒክና ሙያው ዘርፍ የሴቶች ተሳትፎ ደረጃ በመዳሰስ ለመወያያ የሚሆን አጠር ያለ ፅሑፍ በአቶ ነገሰ ከበደ የቀረበ ሲሆን የትምህርት መብትን በሶስት ዋናዋና ክፍሎች ማለትም የመማር መብት፤ የትምህርት ተደራሽነት መብትና በትምህረት ቤት ውስጥ ሴቶችንም ወንዶችንም እኩል የትምህርት ተደራሽነት እንዲኖራቸው ማድረግ በሚሉት ጉዳዮች ላይ ገለጻ አድርገዋል፡፡ በመጨረሻም በቴክኒክና ሙያ ትምህርታቸውን ተምረው ውጤታማ የሆኑ ሴት አሰልጣኞች ተሞክሯቸውን ለመድረኩ ታዳሚዎች አቅርበዋል፡፡ **በህዝብ ግንኙነት የሥራ ሒደት የተዘጋጀ **